Hagaðilar og neytendur

Við leggjum ríka áherslu á opið og gagnsætt samráð við hagsmunaaðila frá fyrstu stigum framkvæmda. Strax í undirbúningsferlinu er haft samráð við fulltrúa viðkomandi sveitarfélaga og tryggt að þau fái reglulega upplýsingar um framvindu verkefnisins. Upplýsingagjöf fer fram á fundum, með formlegum samskiptum í tölvupósti og með öðrum viðeigandi miðlum allt frá undirbúningi til rekstrar. Við umhverfismatsskyldar framkvæmdir er sett á laggirnar verkefnaráð, þar sem fulltrúar nærsamfélagsins eiga sæti. Í ráðinu sitja fulltrúar sveitarfélaga ásamt fulltrúum annarra hagsmunaaðila, svo sem úr ferðaþjónustu, útivist, veiðifélögum, háskólasamfélagi og atvinnuþróunarfélögum. Markmið ráðsins er að tryggja að fjölbreytt sjónarmið fái hljómgrunn og að samráð sé raunhæft og árangursríkt. Með þessu verklagi stuðlum við að traustu samstarfi, gagnsærri ákvarðanatöku og ábyrgri innleiðingu verkefna sem taka mið af þörfum og væntingum samfélagsins.

Við eigum í virkum samskiptum við hagsmunaaðila í gegnum fundi, viðburði, opin hús, kannanir og opinbera samráðsferla. Árið 2024 kynntum við nýtt fyrirkomulag hagsmunaráðs. Framkvæmd var vinnustaðagreining meðal starfsfólks, þar sem spurt er um helstu þætti sem snúa að helgun í starfi. Haldnir voru reglubundnir fundir með sveitarfélögum á helstu framkvæmdaleiðum okkar og haldin voru opin hús til að kynna framkvæmdir Hólasandslínu 1 og Blöndulínu 1. Viðskiptavinakönnun var gerð meðal viðskiptavina þar sem spurt var m.a. um ánægju með þjónustu fyrirtækisins. Framkvæmd var könnun um traust og þekkingu á fyrirtækinu meðal almennings og við tókum þátt í opinberu samráði með umsögnum á samráðsgátt.

Haldnir voru þrír fundir forstjóra með starfsfólki til að auka upplýsingaflæði um málefni sem eru efst á baugi og stefnu og markmið fyrirtækisins.

Við leggjum áherslu á stöðugar umbætur og ábyrg viðbrögð við ábendingum og neikvæðum áhrifum sem kunna að koma upp vegna starfsemi okkar. Til þess höfum við innleitt skýrt verklag fyrir viðbrögð, eftirfylgni og úrbætur. Niðurstöður kannana leiða til úrbótavinnu þar sem teknir eru fyrir þættir sem ekki standast væntingar. Eftirfylgni með aðgerðaráætlunum í kjölfar vinnustaðargreiningar er hjá Mannauðssviði, en hvert svið er með úrbótáætlun út frá sínum niðurstöðum sem framkvæmdastjóri ber ábyrgð á. Úrbótatækifæri viðskiptavinakönnunar eru á ábyrgð Viðskipta- og kerfisþróunar.  Fyrirtækið er í víðtæku samráði umfram lögbundið samráð, sem leiðir af sér margvíslegar athugasemdir í framkvæmdum og rekstri.

Til að tryggja stöðugar umbætur erum við með árlega stjórendarýni, þar sem farið er yfir niðurstöður kannana og úrbætur. Við erum með kerfi fyrir ábendingar og kvartanir, innri og ytri hagaðila. Árlega eru ytri úttektir á stjórnkerfum fyrirtækisins og við gefum út sjálfbærniskýrslu árlega sem veitir gagnsæja innsýn í frammistöðu okkar.

Með virku samtali og samráði við sveitarfélög, verkefnaráð og landeigendur er leitast við að fá fram ábendingar um hvernig draga megi úr neikvæðum áhrifum. Það er m.a. gert með því að bjóða til þátttöku í valkostagreiningum, vinnustofum, bjóða upp á beint samtal við starfsfólk fyrirtækisins auk formlegra umsagna vegna umhverfismats.

Engar kvartanir er varða brot á persónuvernd eða tap á gögnum viðskiptavina bárust fyrirtækinu á síðasta ári, sem endurspeglar öflugt eftirlit og áherslu á gagnavernd.

Við höfum innleitt mannauðs- og mannréttindastefnu ásamt birgjamati sem tekur meðal annars á því að þeir birgjar sem félagið skiptir við tryggi að komið sé fram við starfsfólk af virðingu, öryggi þess sé gætt og lögum sé fylgt í hvívetna. Ef að birgi uppfyllir ekki þær kröfur sem félagið setur, áskiljum við okkur rétt að segja upp samningi við birgja.

Viðskiptavinir okkar geta komið ábendingum og athugasemdum á framfæri til fyrirtækisins í gegnum landsnet.is eða með því að hafa samband við sinn helsta tengilið. Ábendingar eru skráðar í samræmi við ferli því tengdu og úrbætur fylgja ferli þar sem ábyrgðaraðila ber að svara strax ef hægt er eða gera rótargreiningu og viðeigandi umbætur eftir þörfum.

Við leggjum áherslu á örugga og áreiðanlega afhendingu raforku með stöðugri mælingu á frammistöðu kerfisins og starfsfólk í stjórnstöð sem stendur vaktina allan sólarhringinn.  Stöðug gjaldskrá skapar fyrirsjáanleika og stuðlar að traustu rekstrarumhverfi fyrir viðskiptavini. Umhverfi, gagnsæi og samráð eru lykiláherslur enda flutningskerfið mikilvægur innviður sem samfélagið treystir á. Við leggjum ríka áherslu á að lágmarka umhverfisáhrif eins mikið og mögulegt er og tryggja víðtækt samráð um alla okkar starfsemi.

Til að tryggja afhendingaröryggi mælum við frammistöðu kerfisins, fylgjumst stöðugt með og höfum stjórnstöð í viðbragðsstöðu allan sólarhringinn. Viðbragðsáætlanir og regluleg þjálfun og fyrirbyggjandi viðhald tryggja skjót viðbrögð til að tryggja öryggi í flutningi kerfisins. Kerfisáætlun og framkvæmdaáætlun eru gefnar út reglulega til að tryggja stöðuga þróun í samræmi við stefnu fyrirtækisins og stjórnvalda. Þjónustukönnun er gerð árlega og við fylgjum eftir umbótum í kjölfar kannana. Könnunin nær yfir afhendingaröryggi, fyrirsjáanleika gjaldskrár og viðmóti starfsfólks.

Við höfum skipulagt starfsemi okkar með það að leiðarljósi að tryggja árangur með stjórnskipulagi, stefnu og samskiptum við hagsmunaaðila. Við erum þjónustumiðað innviðafyrirtæki  sem ætlað er að veita viðskiptamiða þjónustu. Viðskipta- og kerfisþróunarsvið sér um viðskiptatengsl og samskipti við viðskiptavini ásamt vöruþróun. Með skýrri stefnu er markmiðið að skapa virði fyrir viðskiptavini, standast áætlanir við uppbyggingu kerfisins, tryggja afhendingaröryggi, hagkvæmu verði, gagnsæi í orkuviðskiptum og sjálfbærni. Við höldum úti öflugu samtali við hagsmunaaðila og viðskiptavini eins og fram hefur komið.